Letter to Mom - Letter 1 -

Meri mummy ke baarein mein aaj jab sochata hoon to dukh hota hain. Dukh is baat ka ki sukh ki Paribhasha kya hain ?

Jeevan mein ham sabhi ek pahiyen ki tarah apana jeevan chakra tay karate hain. Jisane pahale mehanat ki upar chadhane mein baad ka safar utana aasan hota jaata hain. Kabhi dukh pahale aur kabhi sukh dekha tha suna tha mahsus bhi kiya. Par shaayad apani maa ke liyen is upsanhaar ko kabhi satya ke roop mein nahin paaya.....

Prarabdha se hi unaki maa ne unhe taqleeph dee, sirf isliye ki baaki betiyon ki tarah voh unhe chod kar na jaayein......yeah ek maa ki mamta hain yeah andhavishvaas , pata nahin.....purva kaal mein vivaha paryanta naari ka jeevan ek sarvavidit itihaas hain .....aur voh bhi ek aaise kunbe mein Jo bada ho , Jahan marwari taur tarike se jeevan vyateet kiya jaata ho, aur jahan unhone dusri bahu ki jagah lee ho, kadam kadam pe unaka istemaal hone ke kai udaharan milate hain......

Raipur aane ke paschaat unake jeevan ki pida shaayad kuch kam hui ho yeah avashya ho sakata hain par usaki avadhi ka andaaza laga paana jara mushkil hain.

Khoobsoorat palon ki chavi ko dhumil karane ke liyen kai tathya hain. Par un palon mein bhi Jo khusboo milati hain aapke paropkar ki, aapki jindadili ki, aapke jindagi se pyaar ki, voh man ke liye ek prerena aur udaharan se kam nahin lagate........

Koi ghar koi vyakati koi samasya Jise aapne chua na ho nazar nahin aati....

Aap mere liyen voh vyakti ho jisane is baat ki neeva mere dimag mein daali hain ki chote prayason se hi sahin aap is duniya ko ek behatar jagah bana sakate ho.......... Thank you mom aapko diya gaya voh holi title hamesha mujhe yaad aata hai. " seva hi pooja hai. "